රාජ්‍ය රහස් හෙළිදරව් කිරීම සම්බන්ධව චෝදනා එල්ල කර තිබූ නඩුවෙන් හිටපු පාකිස්ථාන අග්‍රාමාත්‍ය ඉම්රාන් ඛාන් සහ ඔහුගේ සමීපතමයෙකු වූ හිටපු විදේශ අමාත්‍ය ෂා මහමුද් කුරේෂි නිදහස් කිරීමට ඉස්ලාමාබාද් අධිකරණය අද (03) නියෝග කළා.

ඒ අදාළ චෝදනාව සම්බන්ධයෙන් ඉම්රාන් ඛාන්ට නියමව තිබූ වසර 10ක සිර දඬුවම අහෝසි කරමින්.

අමෙරිකාවේ පාකිස්තාන තානාපතිවරයා එවූ රහසිගත කේබල් පණිවුඩයක් සම්බන්ධයෙන් ප්රසිද්ධ ප්රකාශයක් කිරීම තුළ රාජ්ය රහස් හෙළිදරව් කළ බවට ඉම්රාන් ඛාන්ට මෙම චෝදනාව එල්ල කර තිබුණා.

අනතුරුව මෙම වසර ආරම්භයේ පාකිස්තාන මහමැතිවරණය පැවැත්වීමට දින කිහිපයකට පෙර රාවල්පින්ඩිහි බන්ධනාගාරයක පිහිටුවන ලද විශේෂ අධිකරණයකින් ඉම්රාන් ඛාන්ට සහ කුරේෂිට වසර 10ක සිර දඬුවමක් නියම කරනු ලැබුවා.

කෙසේ වෙතත් ඉම්රාන් ඛාන් මෙම නඩුවෙන් නිදහස ලැබුවද, ඔහුට තවදුරටත් සිරෙන් නිදහස්ව පැමිණීමට අවකාශයක් නැහැ.

ඒ ඔහු ඉස්ලාමීය නීති කඩකරමින් තෙවැනි බිරිඳක් ආවාහ කරගැනීමේ චෝදනාවට වරදකරු වී වසර 7ක සිරදඬුවම් විඳිමින් සිටීම හේතුවෙන්.

‍