119 පොලිස් හදිසි ඇමතුම් අංකයට ව්‍යාජ තොරතුරු සඳහන් ඇමතුමක් ලබාදුන් පුද්ගලයෙකුට වසර 5ක අත්හිටවූ සිරදඬුවම් නියම කිරීමට හැටන් මහේස්ත්‍රාත් අධිකරණය අද (03) නියෝග කළා.

සැකකරු අද හැටන් මහෙස්ත්‍රාත් අධිකරණය වෙත ඉදිරිපත් කිරීමෙන් අනතුරුව විනිසුරු එම් ෆරුක්ඩීන් මහතා මෙම නියෝගය නිකුත් කළා.

පසුගිය වසරේ නොවැම්බර් මස 06 වනදා සැකකරු විසින් 119 පොලිස් හදිසි ඇමතුම් අංකය වෙත ඇමතුමක් ලබාදෙමින් සඳහන් කර ඇත්තේ ගිනිගත්හේන පොලිස් ස්ථානයේ නිලධාරීන් මත්පැන් සාදයක් පවත්වන බවයි..

එම තොරතුර මත හැටන් සහකාර පොලිස් අධිකාරීවරයා ගිනිගත්හේන පොලිස් ස්ථානය වෙත ගොස් හදිසි පරීක්ෂා කිරීමක් සිදුකර ඇති අතර එහිදී අදාළ තොරතුර ව්‍යාජ තොරතුරක් බව අනාවරණය වී තිබුණා.

ඒ අනුව සැකකාර ඇමතුම ලබාදුන් පුද්ගලයා සම්බන්ධයෙන් පරීක්ෂණයක් සිදුකර ඇති අතර එහිදි සැකකරු වරද පිළිගෙන තිබෙනවා.

අධිකරණය විසින් සැකකරුට වැඩිදුරටත් නියෝග කර සිටියේ විමර්ශනය සිදුකළ පොලිස් නිලධාරියා වෙත රුපියල් 10,000ක මුදලක් ද ගෙවන ලෙසයි.

‍