නඩු විභාගයක් අතරවාරයේ ඉදිරිපත් කළ කරුණු තුළින් අධිකරණයට අපහාස කළ බවට චෝදනා එල්ල දැනට නීතිඥභාවය අත්හිටුවා ඇති සුසිල් ප්‍රියන්ත ජයතුංග නැමැත්තා යළි රක්ෂිත බන්ධනාගාරගත කිරීමර ශ්‍රේෂ්ඨාධිකරණය අද (07) නියෝග කළා.

ඒ ඇප මත මුදා හැර සිටී විත්තිකරු ඇප කොන්දේසි කඩකර තිබීම හේතුවෙන්.

විත්තිකරුට චෝදනා එල්ල කර ඇති නීති කෘත්‍යය අද යළි කැඳවනු ලැබුවේ විජිත් මළල්ගොඩ, ශිරාන් ගුණරත්න සහ ජනක් ද සිල්වා යන ත්‍රීපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේයි.

එහිදී ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ලේ සභාපති විනිසුරු විජිත් මලල්ගොඩ මහතා කියා සිටියේ සානුකම්පිත හේතුන් සැලකිල්ලට ගෙන විත්තිකරු ඇපමත මුදාහැරීමට අධිකරණය මීට පෙර තීන්දු කර තිබුණද, ඔහු ඇප කොන්දේසි කඩ කර තිබීම හේතුවෙන් ඇප අවලංගු කර රක්ෂිත බන්ධනාගාර ගත කිරීමට නියෝග කරන බවයි.

නීතිඥ වෘත්තීයේ ආචාර ධර්ම උල්ලංඝනය කිරීම සහ අධිකරණයට අපහාස කිරීම සම්බන්ධයෙන් මෙම විත්තිකරුට එරෙහිව වෙන් වෙන්ව චෝදනා පත්‍ර දෙකක් අධිකරණය හමුවේ ගොනු කර තිබූ අතර ඒවා විවෘත අධිකරණයේ කියවා දෙනු ලැබුවා.

පසුව එම චෝදනාවලට දඬුවම් නොකිරීමට හේතු ඉදිරිපත් කරන ලෙස විනිසුරු මඩුල්ල විසින් විත්තිකරුට දැනුම් දුන් අතර එහිදී විත්තිකරු ප්‍රකාශ කළේ මේ සම්බන්ධයෙන් අධ්‍යයනය කර කරුණු දැක්වීම සඳහා තමන්ට කල් ලබාදෙන ලෙසයි.

එමෙන්ම මෙම චෝදනා පත්‍රයේ සිංහල පිටපතක් තමන් වෙත ලබා දෙන ලෙසත් විත්තිකරු අධිකරණයෙන් ඉල්ලා සිටියා.

ඊට ප්‍රතිචාර දක්වමින් විනිසුරු විජිත් මලල්ගොඩ මහතා සඳහන් කළේ විත්තිකරුට අදාළ චෝදනා පත්‍රය සිංහල භාෂාවෙන් විවෘත අධිකරණයේ ඔහුට පැහැදිලි කර දී ඇති බැවින් එවැනි පරිවර්තනයක් ලබාදීමට අධිකරණය බැඳී නොමැති බවයි.

කෙසේ වෙතත් අදාල චෝදනා පත්‍රයේ සිංහල පිටපතක් තිබේ නම් එය විත්තිකරුට ලබාදීමට ඇති හැකියාව සොයා බලන ලෙසත් විනිසුරුවරයා අධිකරණ රෙජිස්ටාර්වරයාට නියම කළා.

අනතුරුව මෙම පැමිණිලි ලබන වසරේ ජනවාරි 27 වනදා යළි කැඳවන ලෙස ශ්‍රේෂ්ඨාධිකරණය නියෝග කළා.

‍

‍