2015 වසරේ දෙමටගොඩ ප්‍රදේශයේදී තරුණයෙකු ඩිෆෙන්ඩර් රථයක් යොදා පැහැරගැනීම සම්බන්ධයෙන් වූ චෝදනාවන්ට කොළඹ මහාධිකරණ විසින් තමන් වරදකරු කිරීම හා වසර 03ක බරපතල වැඩ සහිත සිරදඬුවම් නියම කිරීමට එරෙහිව හිටපු පාර්ලිමේන්තු මන්ත්‍රී හිරුණිකා ප්‍රේමචන්ද්‍ර මහත්මිය අභියාචනයක් ඉදිරිපත් කර තිබෙනවා.

ජනාධිපති නීතීඥ නලින්ද ඉන්දතිස්ස මහතා මාර්ගයෙන් ගොනුකරනු ලැබු අදාළ අභියාචනා පෙත්සම අද (01) පෙරවරුවේ මහාධිකරණ ලේඛකාධිකාරිවරියට භාර දී ඇති අතර එය අභියාචනාධිකරණයට යොමු කරන ලෙසද ඉල්ලීමක් තිබෙනවා.

මහාධිකරණ විනිසුරුවරයා තමන් වරදකාරිය කරමින් නිකුත් කළ තීන්දුව දෝෂ සහගත බවත් තමන් ඉදිරිපත් කළ කරුණු පිළිබඳ විනිසුරුවරයා සැළකිල්ලක් දක්වා නැති බවත් පෙන්වා දෙන පෙත්සම්කාර හිරුණිකා ප්‍රේමචන්ද්‍ර මහත්මිය තමන් වරදකාරිය කරමින් දුන් තීන්දුව හා තමන්ට පැනවු දඬුවම් ඉවත දමා සියළු චෝදනා වලින් නිදොස් කොට නිදහස් කරන්න ලෙස මෙම අභියාචනයෙන් ඉල්ලා තිබෙනවා.

හිටපු පාර්ලිමේන්තු මන්ත්‍රී හිරුණිකා ප්‍රේමචන්ද්‍ර මහත්මිය විසින් ගොනු කළ මෙම අභියාචනා පෙත්සමේ වගඋත්තරකරු ලෙස නම්කර ඇත්තේ නීතීපතිවරයායි.

එමෙන්ම තමන් සම්බන්ධයෙන් ලබාදුන් ලබාදුන් තීන්දුවට එරෙහිව අභියාචනාධිකරණය වෙත අභියාචනයක් ඉදිරිපත් කර ඇති බැවින් එය විභාග කර අවසන් වන තුරු තමන්ට ඇප ලබාදෙන ලෙසද මේ වන විට බන්ධනාගාරගත කර සිටින හිටපු පාර්ලිමේන්තු මන්ත්‍රී හිරුණිකා ප්‍රේමචන්ද්‍ර මහත්මිය මහාධිකරණයෙන් ඉල්ලීමක් කර තිබෙනවා.

ඒ අනුව අදාළ ඇප ඉල්ලීම සලකා බැලීම එළඹෙන 04 වනදා මහාධිකරණ විනිසුරු අමල් රණරාජා මහතා ඉදිරියේ සිදුකිරීමට නියමිත අතර ඊට එරෙහිව විරෝධතා ඇත්නම් එදින අධිකරණයට ඉදිරිපත් කරන ලෙස නීතිපතිවරයාට නොතීසි නිකුත් කර තිබෙනවා.

දෙමටගොඩ ප්‍රදේශයේ වෙළඳසැලක සේවය කළ තරුණයකු පැහැරගෙන ගොස් අයුතු ලෙස සිරකර තැබීමේ චෝදනාවට වරදකරු කෙරුණු හිටපු පාර්ලිමේන්තු මන්ත්‍රී හිරුණිකා ප්‍රේමචන්ද්‍ර මහත්මියට ඉකුත් 28 වෙනිදා කොළඹ මහාධිකරණ විසින් බරපතළ වැඩ සහිත වසර තුනක සිර දඬුවම් නියම කළා.

ඒ ඇයට එරෙහිව ගොනුකර තිබූ අධිචෝදනා පත්‍රයේ ඇතුළත් චෝදනා 18කට ඇයව වරදකරු කරමින්.

හිටපු පාර්ලිමේන්තු මන්ත්‍රීවරිය සම්බන්ධයෙන් වූ මෙම නඩු විභාගය සිදුවූයේ මහාධිකරණ විනිසුරු අමල් රණරාජා මහතා ඉදිරියේයි.

‍