මහනුවර අධිකරණ සංකීර්ණයේ බෝම්බයක් ඇති බවට අද (02) පෙරවරුවේ පොලිස් හදිසි ඇමතුම් අංශයට ලද තොරතුරක් හේතුවෙන් සියලු අධිකරණ අඩාල වූ අතර අධිකරණ සංකීර්ණයෙන් විනිසුරුවන්, නීතිඥයින් ඇතුළු සියලු දෙනා ඉවත් කිරීමට ආරක්ෂක අංශ කටයුතු කළා.

මෙම දුරකතන ඇමතුම ලැබී තිබුණේ අධිකරණ කටයුතු සිදුවෙමින් පවතින අතරතුර පෙරවරු 10.00ට පමණයි.

අනතුරුව පොලිස් විශේෂ කාර්ය බළකාය, බෝම්බ නිශ්ක්‍රීය අංශය, පොලීසිය හා යුද හමුදාව එක්ව අධිකරණ සංකීර්ණයේ විශේෂ සෝදිසි මෙහෙයුමක් දියත් කළද සැකකටයුතු කිසිවක් හමුවූයේ නැහැ.

කෙසේ වෙතත් මේ හේතුවෙන් මහනුවර අධිකරණ සංකිර්ණයේ සියලු අධිකරණ කටයුතු මෙම මස 16 දා තෙක් නවතා දැමීමට අධිකරණ අමාත්‍යාංශය පියවර ගෙන තිබෙනවා.

ප්‍රශ්නගත දුරකතන ඇමතුම ලබාදුන් අය හඳුනා ගැනීම සඳහා පොලීසිය විශේෂ විමර්ශනයක් ආරම්භ කර තිබෙනවා.

‍