ප්‍රමිතියෙන් තොර ප්‍රතිදේහ එන්නත් මිලදී ගැනීමේ සිද්ධිය සම්බන්ධයෙන් මාළිගාකන්ද මහේස්ත්‍රාත් අධිකරණ විසින් නඩු විභාගය අවසන් වනතුරු රක්ෂිත බන්ධනාගාර ගත කර සිටින හිටපු සෞඛ්‍ය අමාත්‍ය කෙහෙළිය රඹුක්වැල්ල මහතා ඇප මත මුදා හරින්නනේ ද? නැද්ද ? යන නියෝගය අගෝස්තු මස 01 වනදා ප්‍රකාශයට පත්කරන බව අභියාචනාධිකරණය අද (02) ප්‍රකාශ කළා.

ඒ කෙහෙළිය රඹුක්වැල්ල මහතා විසින් ඉදිරිපත් කර තිබූ රිට් පෙත්සම් විභාගය අවසන් කරමින්.

මෙම රිට් පෙත්සම විභාගය සිදුකෙරුණේ අභියාචනාධිකරණ සභාපති විනිසුරු නිශ්ශංක බන්දුල කරුණාරත්න සහ ශෂී මහේන්ද්‍රන් යන ද්වි පුද්ගල අභියාචනාධිකරණ විනිසුරු මඩුල්ල ඉදිරියේයි.

පෙත්සම කැඳවූ අවස්ථාවේ ශ්‍රී ලංකා නීතීඥ සංගමය වෙනුවෙන් පෙනී සිටි ජනාධිපති නීතිඥ චන්දක ජයසුන්දර මහතා කරුණු දක්වමින් කියා සිටියේ ඖෂධ මිලදී ගැනීමේ ක්‍රියාවලියකදි වගකිවයුතු අවසන් බලධරයා මෙම පෙත්සම්කාර අමාත්‍යවරයා බවයි.

හිඟ ඖෂධ මිලදී ගැනීමට ඉන්දීය ණය ආධාර ක්‍රමය භාවිතා කිරීමට කැබිනට් අනුමැතිය හිමිව තිබූ පසුබිමක අමාත්‍යවරයා විසින් සෞඛ්‍ය අමාත්‍යාංශයේ  මුදල් භාවිතා කර ඖෂධ මිලදී ගැනීමට කටයුතු යොදා ඇති බවද ජනාධිපති නීතිඥවරයා පෙන්වා දුන්නා.

එමෙන්ම ඉන්දීය ණය ආධාර ක්‍රමය ලබා දී තිබුණේ අදාළ ඖෂධ ඉන්දියාවෙන් ආනයනය කිරීමට මිස දේශීය නිෂ්පාදකයින්ගෙන් මිලදී ගැනීමට නොවන බවද ඔහු පෙන්වා දුන්නා.

පෙත්සම්කාර හිටපු අමාත්‍යවරයා විසින් කැබිනට් මණ්ඩලයට ඉදිරිපත් කළ කැබිනට් පත්‍රිකාවක් තුළ ඖෂධ වර්ග 182ක් හිඟ බවත්, ඖෂධ වර්ග 14ක් ශුන්‍ය බවත් සඳහන් වී තිබුනද, ඒ කුමන ඖෂධද යන්න පිළිබඳ පෙත්සම්කරුට දැනුවත්භාවයක් නොතිබූ බව ඔහු අපරාධ පරීක්ෂණ දෙපාර්තමේන්තුව හමුවේ සිදුකළ ප්‍රකාශවලින් තහවුරු වන බවද ජනාධිපති නීතිඥවරයා කියා සිටියා.

ඔහු වැඩිදුරටත් පැවසුවේ අදාළ ගැසට් පත්‍රයේ තිබූ ඖෂධ බොහෝමයක් පෙර සිදුකරන ලද ඇනවුම්වලට අනුව ඒ වන විටත් රටට ලැබෙමින් තිබු බවත් එවැනි තත්ත්වයක හිටපු සෞඛ්‍ය අමාත්‍යවරයා කැබිනට් මණ්ඩලය නොමඟ යැවීමට කටයුතු කර ඇති බවයි.

ඒ අනුව මාලිගාකන්ද මහේස්ත්‍රාත් අධිකරණයේ පවතින නීති කෘත්‍යයට අදාළව මෙම පෙත්සම්කරු 08 වන සැකකරු ලෙස නම් කරමින් නඩු විභාගය අවසන් වනතුටරු රක්ෂිත බන්ධනාගාරගත කිරීමට මහේස්ත්‍රාත්වරිය සිදුකර ඇති නියෝගයේ කිසිදු වරදක් නොමැති බවද ජනාධිපති නීතිඥවරයා පැවසුවා.

මෙහිදී විනිසුරු ශෂී මහේන්ද්‍රන් මහතා ප්‍රශ්න කර සිටියේ පෙත්සම්කරු රිමාන්ඩ් භාරයට පත් කිරීමට පෙර අදාළ කරුණු මහේස්ත්‍රාත්වරිය විසින් නිසි අධ්‍යයනයකට ලක්කර තිබේ ද යන්නයි.

ඊට පිළිතුරු දුන් ජනාධිපති නීතිඥවරයා සඳහන් කළේ විමර්ශන නිලධාරින් සහ නීතිපති දෙපාර්තමේන්තුව අධිකරණයට ඉදිරිපත් කළ වාර්තා සම්බන්ධයෙන් ප්‍රශ්න කළ මහේස්ත්‍රාත්වරිය සියලු කරුණු අධ්‍යයනය කරමින් මෙම පෙත්සම්කරුගේ සැකකාරභාවය පිළිබඳ සෑහීමකට පත්ව ඇති බවයි.

අනතුරුව පෙත්සම්කාර කෙහෙළිය රඹුක්වැල්ල මහතා වෙනුවෙන් පෙනී සිටි ජනාධිපති නීතිඥ ෆයිස් මුස්තාපා මහතා පිළිතුරු දේශනය සිදුකරමින් කියා සිටියේ සිය සේවාදායකයා වන පෙත්සම්කාර අමාත්‍යවරයා කිසිදු වරදක් කර නොමැති අතර මෙම සිද්ධිය සම්බන්ධයෙන් ඔහුට එරෙහිව කිසිදු සාක්ෂියක් නොමැති බවයි.

එහිදී විනිසුරු ශෂී මහේන්ද්‍රන් මහතා කුමන්ත්‍රණය යන චෝදනාව පෙත්සම්කරුට එරෙහිව එල්ල කිරීමට සාක්ෂි තිබේදැයි ප්‍රශ්න කළා.

ඊට පිළිතුරු දෙමින් නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් නිර්මලන් විග්නේෂ්වරන් මහතා කියා සිටියේ ලැබීමට නියමිත ඖෂධ ඇනවුම් පිළිබඳ නොතකා ඖෂධ සංගණනය කරන ලෙස පෙත්සම්කරු විසින් උපදෙස් ලබා දී තිබීමම ඔහුට එරෙහිව කුමන්ත්‍රණය චෝදනාව තහවුරු කිරීමට ප්‍රමාණවත් බවයි.

ඊට ප්‍රතිචාර දක්වමින් පෙත්සම්කරු වෙනුවෙන් ජනාධිපති නීතිඥ ෆායිස් මුස්තාපා මහතා කියා සිටියේ ඖෂධ මිලදී ගැනීමේ ක්‍රියාවලිය තුළ සෞඛ්‍ය අමාත්‍යාංශ ලේකම්වරයා ඇතුළු බොහෝ පිරිසක් සිටින බැවින් සාමූහික ලෙස නොගෙන තනි තනිව චෝදනා එල්ල කළ නොහැකි බවයි.

එහිදී විනිසුරු ශෂී මහේන්ද්‍රන් මහතා සෞඛ්‍ය බලධාරීන් පත් කරන්නේ කවුරුන් විසින්දැයි ප්‍රශ්න කළ අතර නිලධාරීන් පත් කරනු ලබන්නේ අමාත්‍යවරයා විසින් බවට ජනාධිපති නීතිඥවරයා පිළිතුරු දුන්නා.

ඉදිරිපත් වූ කරුණු සලකා බැලූ විනිසුරු මඩුල්ල මෙම පෙත්සම සම්බන්ධයෙන් වන ලිඛිත දේශන ජූලි මස 15 වැනිදා හෝ ඊට පෙර ගොනු කරන ලෙස දෙපාර්ශවයේ නීතිඥවරුන්ට නියම කළා.

පෙත්සම්කරු ඉල්ලා සිටින ඇප නියෝගය ලබාදෙමින් අතුරු තහනම් නියෝගයක් නිකුත් කරනවාද යන්න නැද්ද යන්න පිළිබඳව තීන්දුව අගෝස්තු 01 වැනිදා ප්‍රකාශ කරන බවද විනිසුරු මඬුල්ල සඳහන් කළා.

පොදු දේපළ පනත යටතේ ගොනු කළ නඩුවකට අදාළව සැකකරුවෙකු එම නඩු විභාගය අවසන් වන තෙක් රක්ෂිත බන්ධනාගාරගත කිරීමට මහේස්ත්‍රාත් අධිකරණයට බලයක් නොමැති බව දක්වා මෙම පෙත්සම ගොනුකර තිබෙනවා.

ඒ අනුව තමන් නඩු විභාගය අවසන් වන තෙක් රක්ෂිත බන්ධනාගාරගත කිරීමට මාලිගාකන්ද මහේස්ත්‍රාත්වරිය ලබා දුන් නියෝගය නීතියට පටහැනි අයුක්ති සහගත නියෝගයක් බවයි පෙත්සම්කාර හිටපු සෞඛ්‍ය අමාත්‍ය කෙහෙළිය රඹුක්වැල්ල මහතා සිය පෙත්සම තුළ සඳහන් කර ඇත්තේ.

පෙත්සමෙහි වගඋත්තරකරුවන් ලෙස මාලිගාකන්ද මහේස්ත්‍රාත්වරිය, එම අධිකරණයේ රෙජිස්ට්‍රාර්වරයා, පොලිස්පති දේශබන්දු තෙන්නකෝන් මහතා, අපරාධ පරීක්ෂණ දෙපාර්තමේන්තුවේ අධ්‍යක්ෂවරයා, නීතිපතිවරයා ඇතුළු පිරිසක් නම් කර තිබෙනවා.

ජනාධිපති නීතිඥ ෆයිස් මුස්තාපා, නීතිඥ කීර්ති තිලකරත්න සහ නීතිඥ මෙහෙරාන් කරීම් යන නීතිඥ මණ්ඩලය පෙත්සම්කාර් කෙහෙළිය රඹුක්වැල්ල මහතා වෙනුවෙන් පෙනී සිටියා.

නීතිපතිවරයා වෙනුවෙන් මෙම නඩුවට පෙනී සිටින්නේ නියෝජ්‍ය සොලිසිටර් ජනරාල් නිර්මලන් විග්නේෂ්වරන් මහතා සහ නියෝජ්‍ය සොලිසිටර් ජනරාල් ලක්මිණී ගිරිහාගම මෙනෙවියයි.

‍