පාර්ලිමේන්තු මන්ත්‍රී නීතිඥ දයාසිරි ජයසේකර මහතා ශ්‍රී ලංකා නිදහස් පක්‍ෂයේ සාමාජිකත්වයෙන් ඉවත් කිරීම හා ඔහුට එම පක්‍ෂයේ මහ ලේකම්වරයා ලෙස කටයුතු කිරීමට බාධා කිරීම වළක්වාලමින් කොළඹ අතිරේක දිසා විනිසුරු අරුණ වික්‍රමසිංහ මහතා අද ( ජූලි 02) අතුරු තහනම් නියෝගයක් නිකුත් කළා.

ඒ දයාසිරි ජයසේකර මහතා විසින් ගොනු කර තිබූ පෙත්සමක් කැඳවූ අවස්ථාවේදීයි.

එහිදි ජ්‍යෙෂ්ඨ ජනාධිපති නීතිඥ අක්රම් මොහොමඩ් මහතා කළ කරුණු දැක්වීම් සලකා බැලූ අතිරේක දිසා විනිසුරුවරයා එම පෙත්සම විභාග කොට අවසන් තීන්දුවක් ලබා දෙනතුරු බලපැවැත්වෙන පරිදි ශ්‍රී ලංකා නිදහස් පක්‍ෂයේ හිටපු සභාපති මෛත්‍රීපාල සිරිසේන මහතාට සහ වැඩබලන ලේකම් සරත් ඒකනායක මහතාට මෙම අතුරු තහනම් නියෝගය නිකුත් කළා.

2023.09.03 වන දින සිය පක්‍ෂයේ 72 වන සංවත්සරය ශ්‍රී ජයවර්ධනපුර මොනක් ඉම්පීරියල් හෝටලයේදී සාර්ථකව පැවැත්වූ බවත්, එදින පක්‍ෂයේ මහ ලේකම්වරයා ලෙස තමාගෙන් ඉටු විය යුතු සියලු යුතුකම් තමා ඉටු කළ බවත් දයාසිරි ජයසේකර මහතා සිය පෙත්සම තුළ සඳහන් කර තිබෙනවා.

එහිදී මෙම නඩුවේ පළමු වගඋත්තරකාර එවකට පක්ෂ සභාපති මෛත්‍රීපාල සිරිසේන මහතා ඉතා සුහඳශීලි ලෙස තමන් සමඟ හැසිරුණු බවයි ඔහු වැඩිදුරටත් පෙන්වා දී ඇත්තේ.

එවැනි පසුබිමක ඊට දින දෙකකට පසු 2023.09.05 රාත්‍රීයේ හිටපු ජනාධිපති මෛත්‍රීපාල සිරිසේන මහතා විසින් තමාගේ පක්‍ෂ සාමාජිකත්වය වහාම අත්හිටුවා ඇති බවත්, තවදුරටත් පක්‍ෂයේ මහ ලේකම්වරයා ලෙස කටයුතු කළ නොහැකි බවත් විද්‍යුත් තැපෑල මගින් දැනුම් දුන් බව දයාසිරි ජයසේකර මහතා පෙත්සම තුළ සඳහන් කර තිබෙනවා.

පෙත්සම අගෝස්තු 2 වන දා යළි කැඳවීම නියමිතයි.

නීතිඥ සමාධි ගම්ලත්, ජනාධිපති නීතිඥ ජගත් වික්‍රමසිංහ මහතා ඇතුළු නීතිඥ මණ්ඩලයක් සමඟ ජ්‍යෙෂ්ඨ ජනාධිපති නීතිඥ අක්රම් මොහොමඩ් මහතා දයාසිරි ජයසේකර මහතා වෙනුවෙන් පෙනී සිටියා.

‍