2015 වසරේ දෙමටගොඩ ප්‍රදේශයේ වෙළඳසැලක සේවය කළ තරුණයකු පැහැරගෙන ගොස් අයුතු ලෙස සිරකර තැබීමේ චෝදනාවට වරදකරු කෙරුණු හිටපු පාර්ලිමේන්තු මන්ත්‍රී හිරුණිකා ප්‍රේමචන්ද්‍ර මහත්මියට අද (28) කොළඹ මහාධිකරණ විසින් බරපතළ වැඩ සහිත වසර තුනක සිර දඬුවම් නියම කළා.

ඒ ඇයට එරෙහිව ගොනුකර තිබූ අධිචෝදනා පත්‍රයේ ඇතුළත් චෝදනා 18කට ඇයව වරදකරු කරමින්.

හිටපු පාර්ලිමේන්තු මන්ත්‍රීවරිය සම්බන්ධයෙන් වූ මෙම නඩු විභාගය සිදුවූයේ මහාධිකරණ විනිසුරු අමල් රණරාජා මහතා ඉදිරියේයි.

‍

මොකක්ද මේ හිරුණිකා කළ පැහැරගැනීම ?

දෙමටගොඩ ප්‍රදේශයේ රෙදි පිළි අලෙවි සැලක සේවය කළ අමිල ප්‍රියංකර නැමැති 34 හැවිරිදි පුද්ගලයෙක් පැහැරගැනීමට ලක්ව තිබුණේ 2015 වසරේ දෙසැම්බර් මස 21 වනදායි.

කළු පැහැති ඩිෆෙන්ඩර් රථයකින් පැමිණි පුද්ගලයින් 8 දෙනෙකු මෙම පැහැරගැනීම සිදුකර ඇති බව පසුව සොයාගැනුනා.

එමෙන්ම එහිදී අනාවරණය වූයේ අදාළ පුද්ගලයින් හිරුණිකා ප්‍රේමචන්ද්‍ර මහත්මියගේ ආරක්ෂක නිලධාරින් ලෙස කටයුතු කරන්නන් වූ අතර ඔවුන් පැමිණ ඇත්තේද හිරුණිකා ප්‍රේමචන්ද්‍ර මහත්මියට අයත් ඩිෆෙන්ඩර් රථයකින් බවයි.

කෙසේ වෙතත් පැහැරගැනීමට ලක්වූ පුද්ගලයා මහමඟ දමාගොස් සිටියදී පොලීසිය විසින් සොයා ගැනුනු අතර ඔහු ප්‍රකාශයක් ලබා දෙමින් සඳහන් කර තිබුණේ පැහැරගැනීම සිදුකළ පිරිස තමන්ට පහරදුන් බවයි.

‍

ලද පැමිණිල්ලකට අනුව මූලික විමර්ශන ඇරඹෙයි...

සිදුවීම සම්බන්ධයෙන් පැහැරගැනීමට ලක්වූ තරුණයා සේවය කළ රෙදිපිළි අලෙවි සැලේ හිමිකරු දෙමටගොඩ පොලීසියට පැමිණිලි කර තිබූ අතර ඒ අනුව පැහැරගැනීම සම්බන්ධයෙන් මූලික විමර්ශනයක් ආරම්භ වුණා.

පසුව අදාළ විමර්ශන කටයුතු කොළඹ අපරාධ කොට්ඨාසයට භාර වූ අතර එහිදී CCTV කැමරා දර්ශන ඔස්සේ සිදුකරන ලද වැඩිදුර විමර්ශන කටයුතුවලදී අමිල ප්‍රියංකර පැහැර ගැනීම සම්බන්ධයෙන් පාර්ලිමේන්තු මන්ත්‍රී හිරුණිකා ප්‍රේමචන්ද්‍ර මහත්මියගේ ආරක්ෂකයින් 08 දෙනෙකු අත්අඩංගුවට ගෙන රක්ෂිත බන්ධනාගාරගත කෙරුණා.

අනතුරුව සිදුවීම සම්බන්ධයෙන් 2016 ජනවාරි 09 වනදා කොළඹ අපරාධ කොට්ඨාසය විසින් හිරුණිකා ප්‍රේමචන්ද්‍ර මහත්මියවද අත්අඩංගුවට ගෙන අලුත්කඩේ අංක 02 මහේස්ත්‍රාත් අධිකරණයට ඉදිරිපත් කළා.

එහිදී හිරුණිකා ප්‍රේමචන්ද්‍ර මහත්මිය ඇප මුත මුදා හැරුණේ රුපියල් ලක්ෂය බැගින් වූ ශරීර ඇප දෙකක් මතයි.

හිරුණිකා ඇතුළු ආරක්ෂකයින්ට එරෙහිව නීතිපති අධිචෝදනා ගොනුකරයි

අනතුරුව සිදුවීම සම්බන්ධයෙන් සිදුකෙරුණු මූලික විමර්ශනයකින් අනතුරුව හිරුණිකා ප්‍රේමචන්ද්‍ර මහත්මියට සහ ඇගේ පෞද්ගලික ආරක්ෂකයින් 08 දෙනෙකුට එරෙහිව නීතිපතිවරයා චෝදනා 29ක් යටතේ කොළඹ මහාධිකරණය හමුවේ අධිචෝදනා ගොනු කරනු ලැබුවා.

අධිචෝදනා පත්‍රයේ වූ චෝදනා අතරට අයුතු ලෙස සිරකිරිමේ අදහසින් පැහැරගැනීම, අයුතු ලෙස සිරකරගැනීම පොදු අරමුණ කරගත් නීතිවිරෝධී රැස්වීමක සාමාජිකයෙකු වීම, පැහැරගෙන යාම, ඊට ආධාර අනුබලදීම සහ සාපරාධී බලහත්කාරය පෑම යන චෝදනා අයත්.

කෙසේ වෙතත් අධිචෝදනා පත්‍රය සලකා බැලුනු මුල් අවස්ථාවේදීම හිරුණිකා ප්‍රේමචන්ද්‍ර මහත්මියගේ පෞද්ගලික් ආරක්ෂකයින් 08 දෙනා වරද පිළිගත්තා.

ඒ අනුව මහාධිකරණ විනිසුරු ආර්. ගුරුසිංහ මහතා එම විත්තිකරුවන් 08 දෙනාට බරපතල වැඩ සහිත වසර 02ක සිර දඬුවමක් නියම කරමින් එය වසර 12කට අත්හිටවනු ලැබුවා.

එමෙන්ම විත්තිකරුවන් 08 දෙනාටම රුපියල් 32,000 බැගින් දඩ මුදල් ගෙවීමට නියම කෙරුණු අතර විත්තිකරුවන් සියලුදෙනා එක්ව අගතියට පත් පැහැරගැනීමට ලක්වූ තැනැත්තාට රුපියල් 285,000ක වන්දියක් ගෙවිය යුතු බවද අධිකරණ නියෝගයේ සඳහන් වුණා.

කෙසේ නමුත් හිරුණිකා ප්‍රේමචන්ද්‍ර මහත්මිය තමන්ට එරෙහිව ගොනුකර තිබු අධිචෝදනා සම්බන්ධයෙන් නිවැරදිකරු බව පැවසීම හේතුවෙන් ඇයට එරෙහිව පමණක් කොළඹ මහාධිකරණය හමුවේ අධිචෝදනා විභාගය සිදුවුණා.

දීර්ඝ නඩු විභාගයකට පසු තීන්දුව ප්‍රකාශයට පත්වෙයි...

වසර 08ක පමණ කාලයක් සිදුවූ දීර්ඝ නඩු විභාගයකට පසු කොළඹ මහාධිකරණ විනිසුරු අමල් රණරාජා මහතා අද (28) මෙම නඩුවේ තීන්දුව ප්‍රකාශයට පත්කළා.

තීන්දුව ප්‍රකාශයට පත් කරමින් විනිසුරුවරයා සඳහන් කළේ විත්තිකාර හිරුණිකා ප්‍රේමචන්ද්‍ර ඇයට එරෙහිව ගොනුකර තිබු අධිචෝදනා පත්‍රයේ සඳහන් වූ චෝදනා 18කට වරදකරු බවයි.

‍

හිරුණිකා කළ වරදට වසර 69ක දඬුවමක් දියහැකි බව නීතිපති කියයි...

මහාධිකරණ විනිසුරුවරයා හිරුණිකා ප්‍රේමචන්ද්‍ර මහත්මියව වරදකරු කිරීමෙන් පසු ඇයට එරෙහිව

දඬුවම් නියම කිරීමට පෙර පැමිණිල්ල වෙනුවෙන් පෙනී සිටි නියෝජ්‍ය සොලිසිටර් ජනරාල් ජනක බණ්ඩාර මහතා විවෘත අධිකරණය හමුවේ දේශනයක් සිදුකළා.

නියෝජ්‍ය සොලිසිටර් ජනරාල් ජනක බණ්ඩාර - පැමිණිල්ලේ නීතිඥ

" ස්වාමිනි ඔබතුමන්ගේ අධිකරණයෙන් මේ චූදිත නැතැන්තියට දඬුවම් නියම කිරීමට පෙර ඇය කළ වරදේ තීව්‍රතාවය පිළිබඳ මම යම් පැහැදිලි කිරීමක් කරන්න කැමතියි. මේක නිකම්ම නිකම් පුද්ගලයෙක්ව ඩිෆෙන්ඩර් රථයකින් දමාගෙන යාමක් නොවෙයි. බලයේ සිටී ආණ්ඩුවේ මන්ත්‍රීවරියක් අයුතු ලෙස තමන්ගේ බලය පාවිච්චි කර ගෝලබාලයෝ යොදා පුද්ගලයෙක්ව බලහත්කාරයෙන් තමන්ගේ කාර්යාලයට ඇඳගෙන ඇවිල්ලා පවුල් ප්‍රශ්න විසඳන්න දරපු උත්සාහයක්.  මහජන ඡන්දයෙන් පත්වූ මන්ත්‍රීවරියකගේ පරම යුතුකම මහජන විශ්වාසය රැකීම. එහෙම තියෙද්දි මෙහෙමද මන්ත්‍රීවරු මහජනතාවට සලකන්නේ? එබැවින් ස්වාමිනි මේ වරදේ බරපතලකම මේ විත්තිකාරියටත්, ඇයගේ මඟ යන්න සිටින අනිත් අයටත් දැනෙන විදිහේ තීන්දුවක් ඔබතුමන්ගේ අධිකරණය දියයුතුයි. පැමිණිල්ලේ මතය මෙම තැනැත්තියට බන්ධනාගාර ගත කිරීමකින් දඬුවම් දියයුතුයි කියලා. එමෙන්ම එය අත්හිටවූ සිරදඬුවමක් නොවිය යුතුයි. මොකද විත්තිකාරියට විරුද්ධව ඔප්පු වී ඇති චෝදනා 18ට වෙන් වෙන් වශයෙන් දඬුවම් නියම කළොත් අවුරුදු 69කට බන්ධනාගාර ගත කරන්න පුළුවන්. මේ වරද එතරම් තීව්‍රයි. මිනිස්සු අතින් වැරදිවෙනවා. එවිට ඒවා පිළිගන්න නිහතමානි වෙන්න ඕනේ. මෙම සිද්ධියේ අනෙකුත් විත්තිකරුවන් තමන්ගේ වැරුද්ද මුල් අවස්ථාවේදිම පිළිගෙන තිබියදිත් මෙම විත්තිකාරිය වචනයකින්වත් තමන්ගේ වැරුද්ද පිළිගන්න නිහතමානි වුණේ නැහැ. එබැවින් මේ සිද්ධියේදි අගතියට පත් වූ පාර්ශ්වය වෙනුවෙන් අධිකරණය සමාජයට පණිවුඩයක් දෙන්න ඕනේ " නීතිය රකින මිනිස්සුන්ව නීතියෙන් ආරක්ෂා කරනවා කියලා "

‍

‍

හිරුණිකා ප්‍රේමචන්ද්‍ර වෙනුවෙන් නීතිඥයින් ලිහිල් දඬුවමක් ඉල්ලයි...

දඬුවම් නියම කිරීමට පෙර පැමිණිල්ල කළ දේශනයෙන් පසු චූදිත හිරුණිකා ප්‍රේමචන්ද්‍ර මහත්මිය වෙනුවෙන් ජනාධිපති නීතිඥ අනුර මැද්දේගොඩ මහතා ලිහිල් දඬුවමක් ලබාදෙන ලෙස කරුණු ඉදිරිපත් කළා.

ජනාධිපති නීතිඥ අනුර මැද්දේගොඩ - හිරුණිකා ප්රේමචන්ද්ර වෙනුවෙන් පෙනී සිටි නීතිඥ

"  ස්වාමිනි මෙම සිද්ධියේ අනෙකුත් විත්තිකරුවන්ට අධිකරණය මේ වන විටත් අත්හිටවූ සිරදඬුවමක් ලබාදී තිබෙනවා. ඒ වගේම මෙම තැනැත්තිය මහජන ඡන්දයෙන් තේරී පත්වූ මන්ත්රීවරියක්. සමාජ විශමාචාරයන්ට එරෙහිව සමාජ ක්රියාකාරිනියක් ලෙසත් මාගේ සේවාදායිකාව කටයුතු කරනවා. සියල්ලටම වඩා මැය අවුරුදු 03,04 සහ 05 යන වයස්වල පසුවන කුඩා දරුවන් තිදෙනෙක්ගේ මවක්. එබැවින් මෙම කරුණු සියල්ල සලකා බලා මැයට ලිහිල් දඬුවමක් නියම කරන ලෙස මා අධිකරණයෙන් ඉල්ලා සිටිනවා. "

‍

හිරුණිකාට වසර 03ක බරපතල වැඩ සහිත සිරදඬුවමක්...

දඬුවම් නියම කිරීමට පෙර දෙපාර්ෂවය ඉදිරිපත් කළ කරුණු සලකා බැලූ මහාධිකරණ විනිසුරු අමල් රණරාජා මහතා චූදිත හිරුණිකා ප්‍රේමචන්ද්‍ර මහත්මියට එරෙහිව ඔප්පු වූ චෝදනා 18ට වෙන් වෙන්ව සිරදඬුවම් නියම කළ අතර එම සිරදඬුවම වසර 03කින් ගෙවීයන ලෙස බරපතල වැඩ සහිත සිරදඬුවමක් නියම කළා.

එසේම එක් චෝදනාවකට රුපියල් 20,000 බැගින් චෝදනා 18ටම රුපියල් 360,000ක දඩ මුදලක් ගෙවීමට නියෝග කළ මහාධිකරණ විනිසුරුවරයා දඩ මුදල් ගෙවීම පැහැර හරින්නේනම් එක් චෝදනාවකට මාස 06 බැගින් ලිහිල් සිරදඬුවමක් ලබාදීමටද තීන්දු කළා.

‍

හිරුණිකා බන්ධනාගාරයට....

ඒ අනුව 2015 වසරේ දෙමටගොඩ ප්‍රදේශයේදී ඩිෆෙන්ඩර් රථයක් යොදාගනිමින් තරුණයෙකු පැහැරගැනීමේ වරදට වසර 03ක බරපතල වැඩ සහිත සිරදඬුවමක් නියම වූ හිරුණිකා ප්‍රේමචන්ද්‍ර මහත්මිය ඇඟිලි සලකුණු ලබාගැනීමෙන් පසු බන්ධනාගාරයට රැගෙන ගියා

ඇයව මෙලෙස රැගෙන යනු ලැබුවේ වැලිකඩ නව මැගසින් බන්ධනාගාරයටයි.

‍