බුදුදහමට අපහාසයක් වන ලෙස ප්‍රකාශයක් සිදු කළ බවට පවසමින් පවරා තිබු නඩුවෙන් ප්‍රහසන ශිල්පිනී නටාෂා එදිරිසූරිය සහ SL-Vlogs යූ ටියුබ් නාලිකාවේ හිමිකරු බෲනෝ දිවාකර නිදොස් කොට නිදහස් කිරීමට කොටුව මහේස්ත්‍රාත් අධිකරණය අද (19) නියෝග කළා.

නටාෂා එදිරිසූරිය සහ බෲනෝ දිවාකරට එරෙහිව මෙලෙස නඩු පවරා තිබුණේ 2023 අප්‍රේල් 21 වනදා පැවති " මෝඩාභිමානය " නැමැති වැඩසටහනකදී බුදු දහමට අපහාස වන අන්දමේ ප්‍රකාශ කළ බවට සහ එම ප්‍රකාශ ඇතුළත් වීඩියෝව අන්තර්ජාලයට එක්කිරීම සම්බන්ධයෙන්.

‍

නටාෂා සහ බෲනෝ අත්අඩංගුවට ගත් පසුබිම...

2023 අප්‍රේල් 01 වනදා කොළඹ ප්‍රසිද්ධ බාලිකා පාසලක තිබූ " මෝඩාභිමානය " නම් වූ වැඩසටහනකට " Stand up Comedy" ශිල්පිනියක් ලෙස නටාෂා එදිරිසූරිය සහභාගි වී තිබුණා.

අනතුරුව ඇය විසින් කළ ඉදිරිපත් කිරීම අන්තර්ජාලයට එක්කර තිබූ අතර අදාළ ඉදිරිපත් කිරීම තුළින් බුදු දහමට අපහාස කිරීමක් සිදුකර ඇති බවට ආගමික හා පූජ්‍ය පක්ෂ ඇතුළු පාර්ශ්ව රැසකින් චෝදනා එල්ල වුණා.

උද්ගතවූ විරෝධයත් සමඟ අදාළ වීඩියෝව තම Youtube ගිණුමෙන් ඉවත් කිරීමට නටාෂා කටයුතු කර තිබූ අතර අන්තර්ජාලය හරහා පැවති සජීවි සංවාදයකදී ඇය සමාව ඉල්ලීමක්ද සිදුකළා.

"කිසියම් කණ්ඩායමකගේ හෝ පුද්ගලයෙකුගේ හිත රිදීමක් සිදුවූවා නම් බොහොම නිහතමානීව සමාව ඉල්ලනවා. මගේ යුටියුබ් චැනල් එකෙනුත් වීඩියෝව අයින් කරලා තියෙන්නේ."

එහෙත් බුදුදහමට අපහාස කර පසුව සමාජ මාධ්‍ය තුළ විරෝධයක් පැමිණි පසු සමාව ගැනීමෙන් සියල්ක යටගැසීමේ ප්‍රවණතාවයක් නිර්මාණය වී ඇති බව සඳහන් කළ අස්ගිරි මහා විහාර පාර්ශවයේ පුත්තලම මහ දිසාවේ ප්‍රධාන සංඝ නායක, පුජ්‍ය මීගෙට්ටුවත්තේ සුමිත්ත නාහිමියන් පොලිස්පතිවරයාට ලිපියක් යොමු කරමින් ඉල්ලා සිටියේ " නටාෂා එදිරිසූරිය සම්බන්ධයෙන් ICCPR පනත යටතේ ගතහැකි උපරිම ක්‍රියාමාර්ග ගන්නා ලෙසයි. "

මීට අමතරව නටාෂා සම්බන්ධයෙන් බෞද්ධ කටයුතු කොමසාරිස්වරයාද පොලිස්පතිවරයාට ලිඛිත පැමිණිල්ලක් කර තිබූ අතර වෙනත් පාර්ශ්ව 08ක් ඇයට එරෙහිව අපරාධ පරීක්ෂණ දෙපාර්තමේන්තුවට පැමිණිලි කර තිබුණා.

එවන් පසුබිමක 2023 මැයි 28 වනදා අලුයම් කාලයේ නටාෂා එදිරිසූරිය කටුනායක බණ්ඩාරනායක ජාත්‍යන්තර ගුවන් තොටුපොලේදී අපරාධ පරික්ෂණ දෙපාර්තමේන්තුවේ පරිගණක අපරාධ විමර්ශන කොට්ඨාසයේ අත්අඩංගුවට පත්වූයේ සිංගප්පුරුවට පිටත්ව යාමට සූදානමින් සිටියදියි.

අනතුරුව බුදු දහමට අපහාස කළේ යැයි පවසමින් ICCPR පනත යටතේ චෝදනා ගොනුකරමින් නටාෂා කොටුව මහේස්ත්‍රාත් තිළිණ ගමගේ මහතා හමුවට ඉදිරිපත් කළ අතර පසුව ජුනි 07 වනදා දක්වා රක්ෂිත බන්ධනාගාරගත කෙරුණා.

එමෙන්ම අදාළ වීඩියෝව උඩුගත කළ SL-Vlogs යූ ටියුබ් නාලිකාවේ හිමිකරු බෲනෝ දිවාකරද මැයි 31 වනදා අපරාධ පරීක්ෂණ දෙපාර්තමේන්තුවට ප්‍රකාශයක් ලබාදීමට පැමිණි අවස්ථාවේ අත්අඩංගුවට ගැනුනේ නටාෂ එදිරිසූරියට ආධාර අනුබලදීමේ චෝදනාව යටතේයි.

‍

මහේස්ත්‍රාත් අධිකරණයේදී CID ය නැගූ චෝදනා...

රක්ෂිත බන්ධනාගාරගත කර සිටී නටාෂා එදිරිසූරිය සහ බෲනෝ දිවාකර 2023 ජුනි 07 වනදා කොටුව මහේස්ත්‍රාත් අධිකරණයට ඉදිරිපත් කළ අවස්ථාවේ අපරාධ පරීක්ෂණ දෙපාර්තමේන්තුව ඔවුන් එරෙහිව මෙලෙස චෝදනා ඉදිරිපත් කළා.

" ස්වාමිනි මෙවැනි වැඩසටහනක් සංවිධානය කිරීමේදී එහිදි සිදුකරන ඉදිරිපත් කිරීම පිළිබඳ අත්පිටපතක් රැගුම් පාලක මණ්ඩලයට ඉදිරිපත් කර අවසර ලබාගන්න ඕනේ. නමුත් ස්වාමිනි ආන්දෝලනයට තුඩුදුන් මෝඩාභිමානය නැමැති මෙම වැඩසටහනට අදාළව රැගුම් පාලක මණ්ඩලයට ඉදිරිපත් කර තිබෙන්නේ සිදුකිරීමට නියමිත ඉදිරිපත් කිරීම් 06න් 05කට අදාළ අත්පිටපත් පමණයි. එසේ ඉදිරිපත් කර නොමැති අත්පිටපත තමයි මේ පළමු සැකකාර නටාෂා එදිරිසූරියගේ අත්පිටපත. එබැවින් ස්වාමිනි මෙම නිගරු කිරීම සිදුකර ඇත්තේ චේතනාන්විතව රැගුම් පාලක මණ්ඩලය පවා නොමඟ යවමින් "

‍

‍

නටාෂාට සහ බෲනෝට නීතිඥන් ඇප ඉල්ලයි...

ජනාධිපති නීතිඥ අනුජ ප්‍රේමරත්න - නටාෂා එදිරිසූරිය වෙනුවෙන්

" ස්වාමිනි මෙය අප්‍රේල් 01 වනදා කළ හුදෙක් ප්‍රහසනය අරමුණු කරගත් වැඩසටහනක් පමණයි. මම දන්න බෞද්ධ දර්ශනයේනම් මිනිස්සුන්ට වෛර කරන්න පුරුදු කරන්නේ නැහැ. අපි අහලා තියෙන්නේ නහී වේරෙන වේරානි කියලා. ඒ වගේම කාලාම සුත්‍රයේ බුදු හාමුදුරුවෝ පැවිද්දන්ට දේශනා කරනවා යමෙක් කියූ පමණින් දෙයක් පිළිගන්න එපා. තමන්ම විමසීමකින් පිළිගන්න කියලා. එබැවින් මගේ සේවාදායිකාවට අදාළව ICCPR පණත අදාළ කර නොගන්නා ලෙසත් ඇය සුදුසු ඇපයක් මත මුදා හරින ලෙසත් මා ඉල්ලා සිටිනවා. "

ජනාධිපති නීතිඥ නලින්ද ඉන්දතිස්ස - බෲනෝ දිවාකර වෙනුවෙන්

" ස්වාමිනි මාත් බෞද්ධයෙක් මේ ප්‍රශ්නගත විඩීයෝව නිසා අපි කැලඹිලා නැහැ. මොකද බෞද්ධයන් ලෙස අපි තාදි ගුණය ඉගෙනගෙන තිබෙනවා. චිංචිමානවිකාව නෝංජල් කළාට බුදු රජාණන් වහන්සේ නොසැලී සිටියා. චිංචිමානවිකාව කරපු දේත් එක්ක බලද්දි මේක මොකක්ද? ස්වාමිනි මෙවැනි ප්‍රකාශ හමුවේ රටේ බෞද්ධයෝ නොසැලී ඉන්නවා. නමුත් බෞද්ධ ලේබලය ගහගෙන දේශපාලනය කරන අය ඇවිස්සෙනවා. මගේ සේවාදායකයාට තිබෙන්නේ අදාළ වීඩියෝව සමාජ ජාල වෙත උඩුගත කිරීමේ චෝදනාව පමණයි. එබැවින් මගේ සේවාදායකයා ඇප මත මුදාහරින ලෙස මා ඉල්ලා සිටිනවා "

‍

‍

ICCPR පනත යටතේ වරදක් කර ඇති බව කියමින් කොටුව මහේස්ත්‍රාත් අධිකරණයෙන් නටාෂාගේ ඇප ප්‍රතික්ෂේප කරයි...

නටාෂා එදිරිසූරිය සම්බන්ධයෙන් 2023 ජුනි 07 වනදා සිදුකළ ඇප අයැදුමට අදාළ නියෝගය කොටුව මහේස්ත්‍රාත් තිළිණ ගමගේ මහතා විසින් ප්‍රකාශයට පත්කළේ 2023 ජුනි 21 වෙනිදායි.

" පළමු සැකකාරිය වෙනුවෙන් නීතිඥයින් කියාසිටියා ප්‍රශ්නගත ප්‍රකාශය සිදුකළ තැනැත්තිය තුළ බෞද්ධ දර්ශනයට අපහාස කිරීමේ චේතනාවක් තිබුනේ නැහැ එය හුදෙක් හාස්‍යය දැනවීම අරමුණු කරගත් ප්‍රකාශයක් කියලා. එමෙන්ම මෙම ප්‍රකාශයෙන් කියවෙන්නේ සිදුහත් චරිතය එසේත් නැතිනම් බුදුන් වහන්සේ බුද්ධත්වය ලැබීමට පෙර අවධිය බවත් සැකකාරිය වෙනුවෙන් සිදුකළ කරුණු දැක්වීම්වලදී කියවුණා. මම කියන්න කැමතියි, එම ප්‍රකාශයෙන් බුදුන් වහන්සේගේ ළමා කාලය ඉලක්ක වූ බවට කීවත් එහි ගැබ්ව ඇති අපරාධ වරද සුළු කොට සැලකිය නොහැකියි. බුද්ධ චරිතාපදානය බුදුන් වහන්සේ බුදුවීමට සාර අසංඛ්‍ය කල්ප ලක්ෂයක් ( සාරාසංඛ්‍ය කල්ප ලක්ෂයක්) පෙරුම් පිරීමේ සිට ධාතු පරිනිර්වානය දක්වා දිවයනවා. එබැවින් සිදුහත් චරිතය හුදු තවත් එක් ළමා කාලයක් ලෙස සැලකිය නොහැකියි. මෙම ප්‍රකාශය තුළින් පැහැදිලිව බුදුන් වහන්සේගේ ළමා කාලය හාස්‍යයට ලක්කර තිබෙනවා. "

මෙහිදී මහේස්ත්‍රාත්වරයා සැකකාරිය සිදුකර ඇති වරදේ ස්වභාවය උත්තරීතර ආණ්ඩුක්‍රම ව්‍යවස්ථාවේ වගන්ති ඔස්සේ ද පැහැදිලි කළා.

  “ආණ්ඩුක්‍රම ව්‍යවස්ථාවේ 2 වැනි පරිච්ඡේදයේ 09 වැනි ව්‍යවස්ථාව තුළ බුද්ධාගමට ප්‍රමුඛස්ථානය පිරිනමා තිබෙනවා. එවැනි වටපිටාවක තමයි බුද්ධ චරිතයට නිගරු කර තිබෙන්නේ. බොහෝ දෙනෙක් භාෂණයේ අයිතිය පිළිබඳ කතාකරනවා. මම කියන්න කැමති ආණ්ඩුක්‍රම ව්‍යවස්ථාවේ 14 වැනි ව්‍යස්ථාව තුළ භාෂණයේ නිදහස තහවුරු කළ ද, 15 (2) ව්‍යවස්ථාව තුළින් ඊට සීමා පනවා තිබෙනවා. මලල්ගොඩ එරෙහි නීතිපති නඩුවේ දී ශ්‍රේෂ්ඨාධිකරණ ප්‍රකාශ කළා ” භාෂණයේ සහ ප්‍රකාශනයේ නිදහස අන් අයට අපහාස කිරීමට දෙන බලපත්‍රයක් නෙවෙයි ” කියලා.

සැකකාරිය විසින් සිදුකර ඇති වරද 2007 අංක 56 දරන සිවිල් හා දේශපාලන අයිතිවාසිකම් පිළිබඳ ජාත්‍යන්තර සම්මුති පනත යටතට නොවැටෙන බවට නීතිඥයින් කළ කරුණු දැක්වීම සම්බන්ධයෙන්ද මහේස්ත්‍රාත්වරයා අධිකරණයේ මතය පැහැදිලි කළා.

” ප්‍රශ්නගත ප්‍රකාශය තුළ බෞද්ධ චරිතය සහ බෞද්ධ සාහිත්‍යය අතිශයින් හෑල්ලුවට ලක්වී ඇති බව අධිකරණයේ මතයයි. අදාළ ප්‍රකාශය තුළින් බෞද්ධ ජනකොටස් අතෘප්තියට පත්වීම හා ඔවුන් තුළ නොසන්සුන්තාවයක් ඇතිවීම නිරායාසයෙන්ම අනික් ආගම් කෙරෙහි එදිරිවාදිකම්වලට පොළඹවනවා. ශ්‍රී ලංකා ඉතිහාසයේ මෙවැනි සුළු ප්‍රකාශ මත පදනම්ව ආගම් අතර ගැටුම් ඇතිවූ අවස්ථා දැකගන්නට පුළුවන්. එමෙන්ම මෙම වරද නතාශා එදිරිසූරිය චේතනාන්විතව සිදුකර ඇති බව පෙනී යනවා. ප්‍රශ්නගත වැඩසටහනේ අනෙකුත් සියලු ඉදිරිපත් කිරීම්වල පිටපත් සඳහා ප්‍රසිද්ධ රැගුම් පාලක මණ්ඩලයෙන් අවසර ගෙන තිබුණත්, මෙම සැකකාරිය පමණක් නීති කෘත්‍යයට අදාළ ප්‍රශ්නගත කොටස ඇතුළත් පිටපතට අවසර ගෙන නැහැ. එමෙන්ම ඇය සිය ප්‍රකාශ තුළ පිළිගෙන තිබෙනවා පිටපත ලිව්වේ තමා බවත් ඇය විසින්ම පෙර පුහුණුවීම් සිදුකළ බවත්. එබැවින් තම පිටපත ඇය විසින් ප්‍රසිද්ධ රැගුම් පාලක මණ්ඩලයට ඉදිරිපත් නොකිරීම තුළ හිතාමතාම, දැන දැන මෙම වරද සිදුකර ඇති බව ගම්‍ය වෙනවා.

අනතුරුව සැකකාරිය පිළිබඳ ඇප නියෝගය මහේස්ත්‍රාත්වරයා ප්‍රකාශයට පත්කළා.

“කරුණු සියල්ල සලකා බැලීමේදි සැකකාරිය ICCPR පනතේ 3 (1) යටතට ගැනෙන වරදක් සිදුකර ඇති බව අධිකරණයේ මතයයි. එම පනත යටතේ සැකකරුවෙකු ලෙස නම් කරනු ලබන හෝ චෝදනා ලැබු තැනැත්තෙකුගේ ඇප සලකා බැලීය හැක්කේ මහාධිකරණයට පමණයි. ඇය විමර්ශන ඇරඹු අවස්ථාවේම අධිකරණය මඟහැර විදෙස් ගත වීමට උත්සාහ කිරීම තුළ ඇප පනතේ 14 (1) වගන්තිය උල්ලංඝනය වී තිබෙනවා. ඒ අනුව සැකකාරියගේ ඇප ඉල්ලීම ප්‍රතික්ෂේප කරන මෙම අධිකරණය ඇය රක්ෂිත බන්ධනාගාර ගත කිරීමට නියෝග කරනවා.”

‍

බෲනෝට මහේස්ත්‍රාත් අධිකරණයෙන් ඇප...

“මෙම සැකකරුට එරෙහිව ගොනුකර ඇති චෝදනාව තමයි පළමු සැකකාරිය සිදුකළ ප්‍රකාශය ප්‍රචාරය කිරීම සහ ඊට ආධාර අනුබල දීම. පළමු සැකකාරියට එල්ල වන චෝදනාවලට අදාළ වරද සිදුකර ඇත්තේ ඇය විසින්. නමුත් එම වරදට දෙවැනි සැකකරු ආධාර අනුබල දුන් බවට ප්‍රමාණවත් සාක්ෂි ඉදිරිපත් වී නැහැ. එබැවින් ඔහුට එරෙහිව ICCPR පනත යටතේ චෝදනා ගොනු කළ නොහැකියි. දණ්ඩ නීති සංග්‍රහය සහ පරිගණක අපරාධ පනත ප්‍රකාරව ඔහුට එරෙහිව ගොනුකර ඇති වැරදි ඇප ලබාදිය හැකි වැරදි බැවින් ඔහු ඇප මත මුදා හැරීමට අධිකරණය නියෝග කරනවා.”

ඒ අනුව සැකකාර බෲනෝ දිවාකර රුපියල් 50,000ක මුදල් ඇපයක් සහ රුපියල් මිලියනය බැගින් වූ ශරීර ඇප 02ක් මත මුදාහැරීමට නියෝග කළ අධිකරණය ඔහුගේ විදෙස් ගමන් තහනම් කිරීමට නියෝග කළා.

කොටුව මහේස්ත්‍රාත්වරයාගේ තීරණයට එරෙහිව නටාෂා මහාධිකරණයෙන් ඇප ඉල්ලයි...

කොටුව මහේස්ත්‍රාත් තිළිණ ගමගේ මහතා නටාෂාට ඇප ලබාදීම ප්‍රතික්ෂේප කිරීමෙන් පසු ඇයගේ නීතිඥයින් කොළඹ මහාධිකරණය ඉදිරියේ ඇප ඇයැදුමක් ඉදිරිපත් කළ අතර එය සලකා බැලුනේ මහාධිකරණ විනිසුරු ආදිත්‍ය පටබැඳිගේ මහතා ඉදිරියේයි.

ජනාධිපති නීතිඥ අනුජ ප්‍රේමරත්න - නටාෂා එදිරිසූරිය වෙනුවෙන්

" ස්වාමිනි මාගේ සේවාදායිකාව ප්‍රහසන වැඩසටහන් ශිල්පිනියක්.  අදාළ ප්‍රකාශය සිදුකිරීමේදි ඒ හරහා බුදු දහමට හෝ බුද්ධ දර්ශනයට අපහාස කිරීමේ චේතනාවක් ඇයට තිබී නැහැ. කෙසේ වෙතත් ඇයගේ ප්‍රකාශයෙන් කිසියම් ආගමික කණ්ඩායමකට හෝ ජන කණ්ඩායමකට සිත් රිදීමක් ඇති වූයේ නම් ඒ සම්බන්ධයෙන් ඇය සමාව අයැද සිටිනවා. "

ජ්‍යෙෂ්ඨ නියෝජ්‍ය සොලිසිටර් ජනරාල් දිලීප පීරිස් - නීතිපතිවරයා වෙනුවෙන්

" ස්වාමිනි, මෙම තැනැත්තිය මෝඩාභිමානය නමින් වැඩසටහන් තුනක් පවත්වා තිබෙනවා. තුන්වෙනි වැඩසටහන ඇය යොදා ගත්තේ බුදු දහමට නිග්‍රහ කිරීමටයි. ඇය ආගම ඉලක්ක කරගනිමින් මෙම ප්‍රහාරය එල්ල කර තිබෙනවා. ඇය කුරුණෑගල මලියදේව බාලිකා විද්‍යාලයේ උගත් තැනැත්තියක්. ඇය 2017 වසරේ සිට විශාදය නමැති රෝගයට ප්‍රතිකාර ලබා ගන්නා බවටත් සියදිවි නසා ගැනීමේ ප්‍රවණතාවයෙන් පෙළෙන බවටත් පරීක්ෂණවලින් පෙනී ගොස් තිබෙනවා. මෙවැනි තැනැත්තියක් ප්‍රහසන වැඩසටහන් ඉදිරිපත් කිරීමට යාම කොයිතරම් භයානක ද කියලා එකෙන් පේනවා. ඇය මුළු වැඩසටහන පුරාම ඉදිරිපත් කර තිබෙන වචන අසභ්‍ය මෙන්ම අශ්ලීල බවින් යුක්තයි. අසභ්‍ය හා අශ්ලීල බව සරල කරමින් සමාජගත කිරීම තමයි ඇය සිදු කර තිබෙන්නේ. එපමණක් නෙවෙයි මේ වගේ වීඩියෝ පට යූ ටියුබ් නාලිකාවට උඩුගත කරලා ඇය වාර්ෂිකව රුපියල් ලක්ෂ 14 ක පමණ ආදායමක් උපයාගෙන තිබෙනවා"

YOUTUBE වීඩියෝ තුළින් ආදායම් ඉපයීම නීති විරෝධි කියලා නීතියක් තියෙනවාද ?

මෙහිදී නඩු ගොනුව පරික්ෂා කළ මහාධිකරණ විනිසුරුවරයා විමසා සිටියේ,

" ඕනම පුද්ගලයෙකුට යූටියුබ් නාලිකාවට වීඩියෝ උඩුගත කරන්න පුළුවන්. ඒ තුළින් උපයාගන්නා ආදායම නීතිවිරෝධී කියලා කොහේ හරි නීතියක් තිබෙනවද? " යනුවෙන්

එයට පිළිතුරු දුන් ජ්‍යෙෂ්ඨ නියෝජ්‍ය සොලිසිටර් ජනරාල්වරයා කියා සිටියේ එවැනි නීතියක් නොපවතින බැවින් මුදල් උපයා ගැනීම නීති විරෝධි නොවන බවයි.

නටාෂාගේ ප්‍රකාශය වෛරී ප්‍රකාශයක්ද..?

" මේ තැනැත්තිය ඉදිරිපත් කරන වචන සම්බන්ධයෙන් මටත් ගැටලුවක් තිබෙනවා. නමුත් යම්කිසි දෙයක් ඉදිරිපත් කළ පමණින් ඒක වෛරී ප්‍රකාශයක් වෙන්නෙ කොහොමද? විද්‍යාව ගැන තරයේ විශ්වාස කරන පුද්ගලයෙකුට ආගම්වල තිබෙන ඇතැම් කාරණා ප්‍රායෝගික දැයි ප්‍රශ්න කරන්න පුළුවන්. ඒක වෛරී ප්‍රකාශයක් වෙන්නෙ කොහොමද? යම් යම් ප්‍රකාශ වලින් විවිධ පුද්ගලයින්ගේ හා ජන කණ්ඩායම් වල සිත් රිදීම් හා සිත් තැවුල් ඇති වෙන්න පුළුවන්. ඒත් ඒ සියල්ලක්ම වෛරී ප්‍රකාශ යන්නට ඇතුලත් කරන්න බැහැ. " යනුවෙන් සඳහන් කළ විනිසුරුවරයා බුදුරජාණන් වහන්සේ පවා තමා යමක් කී පමණින් එය විශ්වාස නොකරන ලෙසත් හොඳින් සොයා බලා යමක් විශ්වාස කරන ලෙසත් දේශනාකර තිබෙනවා. "

වැඩිදුරටත් කරුණු දැක්වූ මහාධිකරණ විනිසුරු ආදිත්‍ය පටබැඳිගේ මහතා,

"එක්සත් ජාතීන්ගේ සිවිල් හා දේශපාලන අයිතිවාසිකම් පිළිබඳ සම්මුති පනත් කෙටුම්පත පාර්ලිමේන්තුවට ඉදිරිපත් කළේ එවකට විදේශ ඇමැති රෝහිත බෝගොල්ලාගම මහතා විසින්. එසේ ඉදිරිපත් කරමින් එම පනත් කෙටුම්පතේ සඳහන් කර තිබුණේ ශ්‍රී ලංකාවේ මානව හිමිකම් තත්ත්වය යහපත් කිරීම සඳහා මේ පනත් කෙටුම්පත ඉදිරිපත් කරන බව. ඒ වගේම එක්සත් ජාතීන්ගේ සිවිල් හා දේශපාලන අයිතිවාසිකම් පිළිබද සම්මුති පනත තුළ අන්තර්ගත අපේ ආණ්ඩුක්‍රම ව්‍යවස්ථාව තුළ මූලික අයිතිවාසිකම් වශයෙන් පිළිගෙන නොමැති අයිතිවාසිකම් මෙරට තුළ තහවුරු කිරීම සඳහා තමයි අදාළ පනත් කෙටුම්පත ව්‍යවස්ථාදායකය සම්මත කළේ. ඉතින් ඒ පනත් කෙටුම්පතේ 3 (1) වගන්තියේ සඳහන් වෙනවා "වෛරී ප්‍රකාශ" පිළිබඳව. මේ වෛරය ප්‍රකාශය මොනවාද? යන්න එක්සත් ජාතීන්ගේ මහා මණ්ඩලය විසින් සම්මත කළ වෛරී ප්‍රකාශ පිළිබඳ වැඩ සටහනේ සඳහන් වෙනවා. එක්සත් ජාතීන්ගේ නිර්ණායකයට අනුව වෛරී ප්‍රකාශ වර්ග තුනක් තිබෙනවා. සමූල ඝාතන පිළිබඳ වෛරී ප්‍රකාශ, මධ්‍යම මට්ටමේ වෛරය ප්‍රකාශ සහ හුදු නඩු පැවරීම් වලට හේතු වන වෛරී ප්‍රකාශ. ඒ අනුව සිවිල් හා දේශපාලන අයිතිවාසිකම් පිළිබද සම්මුති පනතේ 3(1) වගන්තිය යටතේ සඳහන් "වෛරී ප්‍රකාශ" යන්න අර්ථකථනය කිරීමට සිදු වන්නේ එක්සත් ජාතීන්ගේ නිර්ණායක සමඟයි. එසේ නොකොට භික්ෂූන් වහන්සේ නමක් හෝ බලවත් පුද්ගලයෙක් පැමිණිල්ලක් ඉදිරිපත් කළ පමණින් "වෛරී ප්‍රකාශ" යටතේ පුද්ගලයෙක් අත්අඩංගුවට ගන්න හැකියාවක් තිබෙනවාද යන ප්‍රශ්නය මතුවෙනවා. මොකද මෙරටට සිවිල් හා දේශපාලන අයිතිවාසිකම් පිළිබද සම්මුති පනත හඳුන්වා දීමේදී ව්‍යවස්ථාදායකයේ අරමුණ වුණේ මෙරට මානව හිමිකම් තත්ත්වය වර්ධනය කිරීම. ඊට පටහැනිව මේ ආකාරයෙන් අත්අඩංගුවට ගැනීම් සිදු කළහොත් ව්‍යවස්ථාදායකයේ අරමුණු බිඳ වැටෙන්න පුළුවන්"

‍

නතාෂාගේ ප්‍රකාශ ICCPR පනත යටතට නොවැටෙන බවට තීන්දු කරමින් මහාධිකරණයෙන් ඇප...

" සැකකාරියගේ ප්‍රකාශය තුළින් මහජන කැළඹීමක් ඇති වූ බව තහවුරු කෙරෙන කරුණු කිසිවක් මහේස්ත්‍රාත් අධිකරණය හමුවේ ගොනුකර ඇති බී වාර්තාවේ සඳහන් වන්නේ නැහැ. ඒ අනුව බැලූ බැල්මටම එක්සත් ජාතීන්ගේ සිවිල් හා දේශපාලන අයිතිවාසිකම් පිළිබද සම්මුති පනතේ 3(1) වගන්තියෙන් සඳහන් වැරදි සම්බන්ධයෙන් කරුණු අනාවරණය නොවන හෙයින් සැකකාරිය තවදුරටත් රක්ෂිත බන්ධනාගාර ගත කිරීමට අවශ්‍ය වන්නේ නැහැ. ඇය රුපියල් ලක්ෂයක පුද්ගලික ඇපයක් මත මුදා හරින ලෙස නියෝග කරනවා.

වසරකට පසු නටාෂා සහ බෲනෝ නිදොස් කොට නිදහස් වෙයි...

නටාෂාට මහාධිකරණයෙන් ඇප නියම වූයේ ඉකුත් වසරේ ජුලි 05 වනදායි.

එහෙත් ඉන් පසුවද කොටුව මහේස්ත්‍රාත් අධිකරණය හමුවේ නඩුව සලකා බැලුනා.

කෙසේ වෙතත් නටාෂා එදිරිසූරියට සහ බෲනෝ දිවාකරට එරෙහිව නඩුකරයක් පවත්වාගෙන යාමට සාක්ෂි අනාවරණය නොවන බැවින් ඔවුන් නිදහස් කරන ලෙස නීතිපතිපතිවරයා දන්වා ඇති බව පසුගිය ජුනි 19 වනදා නඩුව කැඳවූ අවස්ථාවේදි අනාවරණය වුණා.

එබැවින් බුදුදහමට අපහාසයක් වන ලෙස ප්‍රකාශයක් සිදු කළ බවට පවසමින් පවරා තිබු නඩුවෙන් ප්‍රහසන ශිල්පිනී නටාෂා එදිරිසූරිය සහ SL-Vlogs යූ ටියුබ් නාලිකාවේ හිමිකරු බෲනෝ දිවාකර නිදොස් කොට නිදහස් කිරීමට කොටුව මහේස්ත්‍රාත් කෝසල සේනාධීර මහතා නියෝග කළා.

‍