ප්‍රශ්නගත ප්‍රමිතියෙන් තොර ප්‍රතිදේහ එන්නත් සිදුවීම සම්බන්ධයෙන් දැනට රක්ෂිත බන්ධනාගාර ගත කර සිටින හිටපු සෞඛ්‍ය අමාත්‍ය කෙහෙළිය රඹුක්වැල්ල මහතා වෙනුවෙන් අද (06) දිනයේ සිදුකළ ඇප ඉල්ලීමද මාලිගාකන්ද මහේස්ත්‍රාත් අධිකරණය ප්‍රතික්ෂේප කළා.

ඒ අනුව ඇප ඉල්ලීම් ප්‍රතික්ෂේප වූ අනෙක් සැකකරුවන් 07 දෙනාද සමගින් හිටපු සෞඛ්‍ය අමාත්‍යවරයා මැයි මස 20 දක්වා තවදුරටත් රක්ෂිත බන්ධනාගාර ගත කිරීමට මාළිගාකන්ද මහේස්ත්‍රාත් ලෝචනී අබේවික්‍රම මහත්මිය නියෝග කළා.

‍

ප්‍රමිතියෙන් තොර එන්නත් WHO අනුමැතිය සහිත පරීක්ෂණාගාරයක පරික්ෂා කිරීමට නියෝග...

‍

අද දිනයේ නීති කෘත්‍යය කැඳවූ අවස්ථාවේදි රජයේ නියෝජ්‍ය සොලිසිටර් ජනරාල් ලක්මිණී ගිරිහාගම මෙනෙවියගේ උපදෙස් මත කරුණු දැක්වූ රජයේ නීතීඥ අසේල විජේසිංහ මහතා, මෙම නඩුවේ පළමු සැකකරු විසින් සපයන ලද දැනට නියමිත උෂ්ණත්වය යටතේ ගබඩා කර තිබෙන හියුමන් ඉමියුනෝග්ලොබියුලීන් සහ රිටොක්සිමැප් එන්නත් මාත්‍රා, ලෝක සෞඛ්‍ය සංවිධානය අනුමත කරන ලද ප්‍රතීතකරණය වූ රසායනාගාරයක පරීක්ෂාවට යොමු කිරීමට නියෝගයක් නිකුත් කරන්නැයි මහෙස්ත්‍රාත්වරියගෙන් ඉල්ලා සිටියා.

එම ඉල්ලීම සලකා බැලූ මාලිගාකන්ද මහෙස්ත්‍රාත් ලෝචනී අබේවික්‍රම මහත්මිය, ජාතික ඖෂධ නියාමන අධිකාරියේ සභාපතිවරයාට සහ සෞඛ්‍ය සේවා අධ්‍යක්ෂ ජනරාල්වරයාට නියෝග කළේ අදාළ පරීක්ෂාව සිදුකරන ලෙසයි.

^‍

‍

සැකකරුවන්ගේ අට දෙනෙකුගේ  ඇප ඉල්ලීම් අදත් ප්රතික්ෂේපයි...

‍

මෙම නඩුවට පොදු දේපළ පනත අදාළ වන බැවින් සැකකරුවන් නඩු විභාගය අවසන් වන තුරු රක්ෂිත බන්ධනාගාර ගත කිරීමට මාලිගාකන්ද මහේස්ත්‍රාත් ලෝචනී අබේවික්‍රම මහත්මිය ඉකුත් මාර්තු මස 03 වනදා නියෝගයක් නිකුත් කළා.

ඒ අනුව මේ වන විට නඩුවේ සැකකරුවන්ට මහේස්ත්‍රාත් අධිකරණයෙන් ඇප ලබාගත හැක්කේ පොදු දේපළ පනතේ විදි විධාන ප්‍රකාරව " අසාමාන්‍ය අවස්ථා සහ විශේෂ කරුණු " ඉදිරිපත් කිරීමෙන් පමණයි.

අද දිනයේ පළමු සැකකරු වන ප්‍රමිතියෙන් තොර එන්නත් සැපයූ සමාගමේ හිමිකරු සුදත් ජානක ප්‍රනාන්දු වෙනුවෙන් පෙනීසිටි නීතීඥවරයා අධිකරණයෙන් ඉල්ලා සිටියේ තම සේවාදායකයා විසින් සපයන ලද එන්නත් මාත්‍රාවල ප්‍රමිතිය පරීක්ෂා කිරීමට මෙරට තුළ පහසුකම් නොමැති අතර ඒවා ප්‍රමිතියෙන් තොර බවට විධිමත්ව ඔප්පු වී නොමැති බැවින් එය විශේෂ කරුණක් සේ සලකා සිය සේවාදායකයාට ඇප ලබා දෙන ලෙසයි.

එමෙන්ම හතරවෙනි සැකකරු වන වෛද්‍ය සැපයුම් අංශයේ ගණකාධිකාරි නෙරාන් ධනංජය වෙනුවෙන් පෙනී සිටි නීතිඥවරයා සිය සේවාදායකයාට අවුරුදු 1 1/2 ක දරුවෙකු සිටින බැවින්ද, එම දරුවාව රැක බලාගන්න බිරිඳ ශල්‍යකර්මයකට භාජනය කළ යුතුව පවතින බැවින්ද, දරුවාගේ රැකවරණය සලකා බලා සැකකරු ඇප මත මුදා හරින ලෙස ඉල්ලීමක් කළා.

හිටපු සෞඛ්‍ය අමාත්‍ය කෙහෙළිය රඹුක්වැල්ල මහතා වෙනුවෙන් ඇප අයැදුමක් ඉදිරිපත් කරමින් නීතීඥ ලක්මාල් රත්නායක මහතා පැවසුවේ වැඩිදුර විමර්ශන තුළින් සිය සේවාදායකයාට එරෙහිව සාක්ෂි අනාවරණ වී නොමැති බැවින් එය ඔහුට ඇප ලබාදීමේදී සුවිශේෂී කරුණක් ලෙස සැලකිය හැකි බවයි.

සෞඛ්‍ය අමාත්‍යාංශයේ අතිරේක ලේකම් සමන් රත්නායක මහතා වෙනුවෙන් ඇප අයැදුම සිදුකළ ජනාධිපති නීතිඥ ප්‍රියන්ත නාවාන මහතා කියා සිටියේ නඩුවේ මුල් අවස්ථාවේ සිදුවිය යුතු විමර්ශන තවමත් සිදුකරන බැවින් මේ වන විටත් මාස 06ක කාලයක් සිය සේවාදායකයාගේ පෞද්ගලික නිදහස අහිමිවී ඇති බැවින් එය සුවිශේෂි කරුණක් ලෙස සලකා සිය සේවාදායකයා ඇප මත මුදා හරින ලෙසයි.

කෙසේ වෙතත් ඉදිරිපත් වූ සියලු ඉල්ලීම් තුළ ඇප ලබාදීමට තරම් විශේෂ කරුණු නොමැති බව සඳහන් කළ මහේස්ත්‍රාත්වරිය හිටපු සෞඛ්‍ය අමාත්‍ය කෙහෙළිය රඹුක්වැල්ල මහතා ඇතුළු සැකකරුවන් 08 දෙනා මැයි මස 20 වනදා දක්වා තවදුරටත් රක්ෂිත බන්ධනාගාර ගත කිරීමට නියෝග කළා.

‍

එක් සැකකරුවෙකුට ඇප ලැබුනේ කොහොමද..?

‍

කෙසේ වෙතත් මෙම නඩුවේ 11වන සැකකරු ලෙස නම්කර සිටින ප්‍රශ්නගත ප්‍රතිදේහ එන්නත් ගනුදෙනුවේදි ඇගයිම් කමිටු සාමාජිකයෙකු ලෙස ක්‍රියාකළ වෛද්‍ය තුසිත සුදර්ශන මහතාට අද ඇප හිමිවුණා.

ඒ ඔහුගේ රෝගී තත්ත්වන් පිළිබඳ විශේෂඥ වෛද්‍ය කමිටුව ඉදිරිපත් කර තිබු වාර්තාවට අනුවයි.

එහි දැක්වුණේ මෙම සැකකරු " අධි අවධානම් හෘද රෝගියෙකු වන අතර ඔහු තවදුරටත් බන්ධනාගාරය තුළ රඳවා තැබීමෙන් ඔහුගේ ජීවිතයට අවධානමක් එල්ලවිය හැකි " බවයි.

සැකකරු ඇප මත මුදා හැරීමට පැමිණිල්ල වෙනුවෙන් නීතිපතිවරයාද සිය විරෝධය පළ නොකළ අතර ඔහු රුපියල් ලක්ෂයක මුදල් ඇපයක් සහ රුපියල් ලක්ෂ 05 බැගින් වූ ශරීර ඇප දෙකක් මත මුදා හැරීමට මාලිගාකන්ද මහේස්ත්‍රාත් ලෝචනී අබේවික්‍රම මහත්මිය නියෝග කළා.

‍