හිටපු රාජ්‍ය ඇමතිනි ඩයනා ගමගේ මහත්මියට එරෙහිව ශ්‍රේෂ්ඨාධිකරණ හමුවේ ගොනුකර ඇති අධිකරණයට අපහාස කිරීම සම්බන්ධයෙන් වූ පෙත්සම සලකා බැලීමේ කටයුතුවලින් විනිසුරුවන් දෙදෙනෙක් අද (26) ඉවත්වුණා.

මෙලෙස ඉවත්වෙනු ලැබුවේ කුමුදුනි වික්‍රමසිංහ සහ ජනක් ද සිල්වා යන ශ්‍රේෂ්ඨාධිකරණ විනිසුරුවන් දෙපළයි.

අදාළ පෙත්සම සලකා බැලීම සඳහා ප්‍රීති පද්මන් සූරසේන, කුමුදුනි වික්‍රමසිංහ සහ ජනක් ද සිල්වා යන මහත්ම මහත්මීන්ගේ සමන්විත ත්‍රී පුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ අද කැඳවූ අවස්ථාවේදී එම විනිසුරුවන් දෙපළ සිය ඉවත්වීම ප්‍රකාශයට පත්කළා.

ඒ අනුව අදාළ පෙත්සම සලකා බැලීම සඳහා අගෝස්තු මස 05 වනදා යළි කැඳවීමට නියමිතයි.

ඩයනා ගමගේ මහත්මියගේ පාර්ලිමේන්තු මන්ත්‍රී ධුරය අහෝසි කරමින් ශ්‍රේෂ්ඨාධිකරණය තීන්දුව ප්‍රකාශයට පත්කිරීමෙන් පසු ඇය මාධ්‍ය හමුවකදී ප්‍රකාශ කරනු ලැබූ අදහස්වලින් අධිකරණයට අපහාසයක් සිදුකර ඇති බවට මෙම පෙත්සම ගොනුකර තිබෙනවා.

අදාළ පෙත්සම ගොනුකර ඇත්තේ වැලිගම නගර සභාවේ හිටපු සභාපති රෙහාන් ජයවික්‍රම මහතා විසින්.

‍